اشتقت ليك اوى يا رسول الله واشتقت لحضنك اللى هترمى فيه وابكى بكاء كتير
بكا على ايه ولا ايه؟
بكا على الحال اللى احنا فيه؟
بكا على الحق الى ضايع بيننا
بكا على غربة الواحد عايشها
بكا على احساس بشوق ممزوج بعجز
بكا على احلام كتير كل يوم بتموت
بكا على احساس بفقدك فى حياتنا
وجودك بيننا اكيد كان هيعطينا شعور بالامان
شعور بالحنان...شعور بالراحه
كنت هتهون علينا كتير من مصايب الدنيا
مهما حصل لينا نيجى نترمى فى حضنك ونحكى لك
تخفف عننا وتداوى همومنا وتطبطب علينا بحنية
حنية الاب والجد والحبيب
وقتها كانت هتهون علينا حجات كتير اوى
كنت هحكى لك على ظلم شفته بعينى اكتر من مرة
ظلم انسان لانسان زيه
هحكى لك على مرار دقته فى غياب اغلى واهم ناس فى حياتى
وحشونى اوى
يارب قرب البعيد ورجع أيامى أنا ليّا
ياترى احنا هنستاهل الحضن والحنية دى ؟
ولا مش احنا
احنا اللى هنعزمك ونحكى لك
ولا مش احنا
مش احنا اللى هنفرح قلبك
خوف رهيب بيهزنى من جوا؟؟
احنا ولا مش احنا؟؟
سامحنى انا عرفا ان شوية كويسة وشوية وحشة
بس الدنيا قاسية وحادة وكتير بنشوفها غامقه
مش ذنبنا!!!!!!
الامل فى ربنا كبير اوى بس يارب احنا تعبانين اوى
هون علينا أيامنا
فرج عننا اللى احنا فيه
ونور حياتنا بنور حبايب قلوبنا
واجمع بيننا وبينهم قريب اوى
يمكن دموعنا بقت عاجزة عن التعبير
يمكن من كتر اللى فينا معدناش قادرين نعمل حاجه
بنحاول ننسى ونعيش....
انا واثقة جدا ان فرجك قريب اوى يارب
ومازلت اذوب شوقا لك يا حبيبى
يارسول الله
الهم اقرأه منّا السلام واخبره اننا نحبه
