هابى بيرث داى تو..مـــــــــــى

انه فى مثل هذا اليوم

1572007

أصبح عندى الان 22 عاما

كبرت أوى

أنا بجد زعلانة

زعلانة على أيام ضيعتهافى حجات ملهاش لازمة..كتير بيفوت مننا حجات كتير

لكن فى وقت قصير ممكن ننجز حجات كتير معملنهاش طول عمرنا

اكيد سنين عمرى اللى عدت عملت فيها حجات كتير مفيدة حلوة

لكن الاكيد اكتر انى ضيعت حجات كتير منى بس مهم انى اكون عرفت ايه اللى ضيعته

وبحاسب نفسى لان دا ا طريق الصح

دقت نجاحات الحمدلله كتير

خضت تجارب كتير

واكتسبت خبرات كتير

صاحبت ناس كتير احتكيت بناس كتيروشفت انواع مختلفة

حاولت اتعلم منهم

اخدت ناس منهم قدوة واتعلمت من اخطاء ناس

اثر فى حياتى ناس ورفعت كل قبعات الاحترام والتقدير والامتنان للكثير

وكمان خذلنى ناس كتير

فاتعلمت من كدا ان الدنيا يوم ليك ويوم عليك حتى لو مش متقبلة دا ولكن بحاول افهمه لنفسى عشان اقتنع ومتعبش

مرت عليا أيام مكنتش اتمنى انها تمر ومرت أيام كنت اتمنى انها تطول اكتر واكتر

هزرت كتير ضحكت كتير ولعبت كتير

وبكيت كمان كتيــــــــــــــــــــــــــر

بكيت على احلام كتير محققتهاش ..بكيت على فقد أشياء

بكيت على جفاء صديق..بكيت عندما فقدت ثقة

بكيت خوفا من ربى وشوقا لرسولى

بكيت من فرحتى واحساسى مرة برضاهم عليا

اللحظات دى كانت تطيل عمرى الضعف

وبكيت لما حسيت باستبدال ..وحرمان من طاعة

بكيت لما حستنى صغيرة أدام نفسى

بكيت اما مرة زعلت أمى أو سمعت كلمة منها تضايقنى

انها مرت فى البكاء لما اتجرحت بكلمة من أبى حتى لو كانت دون قصده ولمصلحتى

لا اعرف لماذا؟؟هل هذا هو الطبيعى أم انى حساسة جدا؟؟

بكيت عندما انتظرت ما لم يأتى..وعندما تعشمت فخُذلت

بكيت لما ضيعت وقت كتير مع شخص أو شئ لا يستحق

بكيت لما اكتشفت حجات فيا متأخر

ولكن مع كل دمعه كان هناك تفكير عميق

وتعلمت انهتمر بك الضحكة فتملأ وجهك نور ..وتمر بك الدمعه فتغمرك فى اعماق الاحزان

اتعلمت ايضا

ان العلاقات الانسانية من اهم الاشياء فى الحياة بداية بعلاقتك بربك الى علاقتك باقل شخص عمرا او قيمة فى حياتك

اتعلمت كمان ان هناك مرحلة بعد الدموع قاسية جدا وقتها بتكون شخص مشلول نفسيا..

مش قادرتستحمل اى شئ مفرح او حتى ستريس

يعنى مرحلة بتوصل فيها لاخرك والمرحلة دى بتاثر فى كل حتة فى جسمك مش بس قلبك

والخروج منها بيكون باللجوء لله لانه اكتر دراية بينا من نفسنا

اتعلمت ان اكون مخلصة بس اخد بالى من يستحق هذا الاخلاص

اتعلمت انى دايما اسيب ولو خط رفيع بينى وبين اى شخص لانى مفيش اى حاجه بتحصل صدفة واكيد ربنا قاصد

يوصلنى رسالة من خلال معرفتى بالشخص دا

اتعلمت كمان انى مفيش اى شئ فى الحياة على اطلاقه وكل شئ نسبى وبنحكم على الاشياء من خلال وجهة نظرنا

ومقايسنا الخاصة ورؤيتنا اللى بالضرورى تختلف عن الاخرين

اتعلمت احدد اولوياتى واعمل بيها مش بس لمجرد التحديد

اتعلمت ان فى حجات بتتحس استحالة تتقال

اتعلمت انى فى حجات مش بحس اوى بقيمتها غير لما افقدها

اتعلمت انى احاول اتحكم فى قلبى لانه اذا اتحكم فيا ...انا الشخص الوحيد اللى هيكون خسران

اتعلمت ان خير الامور الوسط وما زاد عن الحد فعلن يتقلب للضد

فهمت حجات كتير كنت بحاول مفكرش فيها

فهمت معنى الابتلاء ......الاصطفاء...الاعتناء سواء الهى او شخصى

عرفت ازاى افهم الاحساس صح واتعامل معاه صح

اشتغلت فى تيم وحسيت ازاى بيكون فى ناس قلبهم على بعض نيتهم واحده وهدفهم واحد

وكلهم فى مركب واحد

حبيتهم كتيرو اتعلمت منهم كتير

لحظاتى معاهم لا تنسى

حسيت ازاى اكون فرد مؤثر فى عيلتى واهمية لمة العيلة والاخوات حولين بعض

الاحاسيس دى علتنى اوى

الحمدلله

اللى اتمناه السنة اللى جايه ان ازداد خبرة

اخد بالى من نفسى اكتر مش بأنانية ولكن باهتمام لانى اهم شخص بالنسبة لنفسى

اتمنى ان ربنا يكون راضى عنى دايما واحس باللى حواليا ويحسوا بيا اكتر

ويارب تحقق كل اللى بتمناه

يمكن دا ميلاد مختلف حساه لمسنى اوى واثرفيا كتير لدرجة انى نفسى اوقف عمرى

لانه قصير ومحتاجه لسا اعمل كتير

ربنا معايا ويخلينى ليا ويهدينى

ويبارك لى فى كل اللى حواليا

ويسمعنى دايما اخبار حلوة عن كل احبابى الموجودين والغايبين

ويطمن قلوبنا وينورها بنوره

يلا كل سنة وانت قمر العيلة يا نورانى وعقبال العمر اللى ربنا مقدره ليكى لأن دا الخير

بس تكونى دايما راضية عن نفسك وربك راضى عليكى